Feeds:
Posts
ಟಿಪ್ಪಣಿಗಳು

Archive for the ‘ಚಿಂತನ’ Category

Picture 167
೨೬-೫-೨೦೧೪ ಸಂಜೆ ೬ ಗಂಟೆಗೆ ಎಲ್ಲರ ಮನದಲ್ಲೂ ಹರ್ಷ. ೧೨೫ ಕೋಟಿ ಜನರ ಭರಪೂರ ಆಶೋತ್ತರ ಹೆಗಲಲ್ಲಿಟ್ಟುಕೊಂಡು ನಮ್ಮ ದೇಶದ ಪ್ರಧಾನಮಂತ್ರಿಯಾಗಿ ನರೇಂದ್ರ ದಾಮೋದರದಾಸ್ ಮೋದಿಯವರು ಪಟ್ಟಾಭಿಷೇಕಗೊಳ್ಳುವ ಕ್ಷಣವದು. ಸಂಜೆ ೫.೩೦ಕ್ಕೆ ವ್ಯಾಯಾಮಕ್ಕೆ ಚಕ್ಕರ್ ಹೊಡೆದು ನಾನು ದೂರದರ್ಶನದ ಮುಂದೆ ಹಾಜರ್! ರಾಷ್ಟ್ರಪತಿ ಭವನದ ಮುಂಭಾಗ ವಿಶಾಲ ಅಂಗಳದಲ್ಲಿ ಮುಸ್ಸಂಜೆ ಹೊತ್ತಲ್ಲಿ ನಡೆಯುವ ಸಂಭ್ರಮವನ್ನು ನೋಡಲು ಸಾಕಷ್ಟು ಆಹ್ವಾನಿತರು ಅದಾಗಲೇ ಆಸೀನರಾಗಿದ್ದರು. ಪ್ರಮುಖರು ಒಬ್ಬೊಬ್ಬರೇ ಬಂದು ತಮಗೆ ನಿಗದಿಗೊಳಿಸಿದ ಸ್ಥಳದಲ್ಲಿ ಕೂತರು. ಬೆಂಗಳೂರು ದೂರದರ್ಶನದ ಮಹೇಶ ಜೋಶಿ, ರವಿಶಂಕರ್ ಗುರೂಜಿ, ಶ್ರೀ ಶ್ರೀ ಪೇಜಾವರ ವಿಶ್ವೇಶ್ವರ ತೀರ್ಥ ಸಾಮೀಜಿ ಆಸೀನರಾಗಿದ್ದದ್ದು ಕಂಡೆ. ತುಂಬಿದ ಸಭಾಂಗಣವನ್ನು ನೋಡುವುದೇ ಚಂದ. ಮೋದಿಯವರು ಸಂಜೆ ಆರು ಗಂಟೆಗೆ ಸಭಾಂಗಣಕ್ಕೆ ಬಂದರು.

DSCN8416
ಭಾರತದ ಪ್ರಧಾನಮಂತ್ರಿಯ ಪ್ರಮಾಣವಚನ ಸ್ವೀಕಾರ ಸಮಾರಂಭಕ್ಕೆ ಇದೇ ಮೊದಲ ಸಲ ಸಾರ್ಕ್ ರಾಷ್ಟ್ರಗಳ ನಾಯಕರನ್ನು ಆಹ್ವಾನಿಸಿದ್ದು, ಅವರೆಲ್ಲ ಬಂದು ಈ ಅವಿಸ್ಮರಣೀಯ ಕಾರ್ಯಕ್ರಮಕ್ಕೆ ಸಾಕ್ಷಿಯಾದರು. ನೇಪಾಳ ಪ್ರಧಾನಿ ಸುಶಿಲ್ ಕೊಯಿರಾಲ, ಶ್ರೀಲಂಕಾ ಅಧ್ಯಕ್ಷ ಮಹಿಂದಾ ರಾಜಪಕ್ಸ, ಪಾಕಿಸ್ತಾನದ ಪ್ರಧಾನಿ ನವಾಜ್ ಷರೀಫ್, ಭೂತಾನ್ ಪ್ರಧಾನಿ ಷೆರಿಂಗ್ ತೊಬ್ಗೇ, ಆಫ್ಘಾನಿಸ್ತಾನದ ಅಧ್ಯಕ್ಷ ಹಮೀದ್ ಕರ್ಜಾಯಿ, ಮಾಲ್ಡೀವ್ಸ್ ಅಧ್ಯಕ್ಷ ಅಬ್ದುಲ್ಲಾ ಯಮೀನ್ ಅಬ್ದುಲ್ ಗಯೂಮ್, ಬಾಂಗ್ಲಾದೇಶದ ಪ್ರಧಾನಿ ಶೇಖ್ ಹಸೀನಾ ಅವರ ಪ್ರತಿನಿಧಿಯಾಗಿ ಸ್ಪೀಕರ್ ಶಿರಿನ್ ಚೌಧರಿ, ಸೇರಿದಂತೆ ಉಳಿದ ರಾಷ್ಟ್ರಗಳ ನಾಯಕರು ಆಗಮಿಸಿ ಕಾರ್ಯಕ್ರಮದಲ್ಲಿ ಪಾಲ್ಗೊಂಡರು. ಮಾರಿಷಸ್ ಪ್ರಧಾನಿ ನವೀನ್ ತಾಮ್ ಗುಲಾಮ್ ಕೂಡ ಆಗಮಿಸಿದ್ದರು.

ರಾಜಪಕ್ಸ ವಿರುದ್ಧ ತಮಿಳುನಾಡಿನಲ್ಲಿ ವಿವಿಧ ರಾಕ್ಜಕೀಯ ಪಕ್ಷಗಳು ಪ್ರತಿಭಟನೆ ನಡೆಸಿವೆ. ರಾಜಪಕ್ಸ ಅವರನ್ನು ಕರೆಸಿದ್ದಕ್ಕೆ ತಮಿಳುನಾಡು ಮುಖ್ಯಮಂತ್ರಿ ಜಯಲಲಿತ ದೆಹಲಿಗೆ ಹೋಗಲಿಲ್ಲ. ಆ ಗೈರುಹಾಜರಿ ಅವರ ಮನಸ್ಸಿನ ಹುಳುಕನ್ನು ಹೊರಹಾಕಿತು. ಕರ್ನಾಟಕ ಮುಖ್ಯಮಂತ್ರಿ ಸಿದ್ಧರಾಮಯ್ಯ ಕೂಡ ಈ ಸಮಾರಂಭಕ್ಕೆ ಹೋಗಲಿಲ್ಲ. ಅವರು ಹೋಗದೆ ಇದ್ದದ್ದರಿಂದ ದೇಶಕ್ಕೆ ಯಾವ ನಷ್ಟವೂ ಆಗಲಿಲ್ಲ. ಅವರಿಗೇ ವೈಯಕ್ತಿಕ ನಷ್ಟ ಅಷ್ಟೆ. ಸಿದ್ದರಾಮಯ್ಯ ಈ ಸಮಾರಂಭಕ್ಕೆ ಪಾಲ್ಗೊಳ್ಳದೆ ಇದ್ದದ್ದಕ್ಕೆ ೨೭ ಮೇ ೨೦೧೪ರ ಪ್ರಜಾವಾಣಯಲ್ಲಿ ಸಂಪಾದಕೀಯ ಪುಟದಲ್ಲಿ `ಮಹಾ ಪ್ರಮಾದ’ ಎಂಬ ತಲೆಬರಹ ಕೊಟ್ಟು ಅವರಿಗೆ ಝಾಡಿಸಿ ಲೇಖನ ಪ್ರಕಟಿಸಿತ್ತು. ಅದನ್ನು ಓದಿ ಓದುಗರು ಪಶ್ಚಾತ್ತಾಪ ಪಟ್ಟಿರಬಹುದೇ ಹೊರತು ನಮ್ಮ ಮುಖ್ಯಮಂತ್ರಿಗಳು ನೊಂದುಕೊಂಡಿರಲಿಕ್ಕಿಲ್ಲ ಎಂದು ಬರೆದವರಿಗೂ ಗೊತ್ತು, ಓದಿದವರಿಗೂ ಗೊತ್ತು!

Picture 350

ಎಲ್ಲ ಗಣ್ಯರು ಬಂದು ಆಸೀನರಾದಮೇಲೆ ರಾಷ್ಟ್ರಪತಿ ಪ್ರಣವ ಮುಖರ್ಜಿಯವರು ಬಂದರು. ಮೊದಲಿಗೆ ರಾಷ್ಟ್ರಗೀತೆ. ಎಲ್ಲರೂ ಎದ್ದು ನಿಂತು ಗೌರವ.

DSCN8553

ತದನಂತರ ೧೬ನೇ ಲೋಕಸಭೆ ಪ್ರವೇಶಕ್ಕೆ ಸಚಿವರಿಂದ ಪಮಾಣವಚನ ಸ್ವೀಕಾರ ಸಮಾರಂಭ. ಪ್ರಥಮವಾಗಿ ನರೇಂದ್ರಮೋದಿಯವರಿಗೆ ರಾಷ್ಟ್ರಪತಿಯವರಿಂದ ಆಹ್ವಾನ. ಮೋದಿಯವರು ವೇದಿಕೆಗೆ ಬಂದು `ಮೈ ನರೇಂದ್ರ ದಾಮೋದರದಾಸ್ ಮೋದಿ ಈಶ್ವರ್ ಕಿ ಶಪಥ್ ಲೇತಾ ಹೂಂ ಕಿ’ ಎಂದು ಗಂಭಿರಭಾವದಿಂದ ಹೇಳಿದಾಗ ಎಲ್ಲರ ಮೊಗದಲ್ಲೂ ಹರ್ಷ.

DSCN8438

(ಪ್ರಮಾಣವಚನವನ್ನು ಹೇಳಿದ್ದನ್ನೇ ಎರಡೆರಡು ಸಲ ಹೇಳುವುದು ಏಕೆ ಎಂದು ತಿಳಿಯಲಿಲ್ಲ. ನಿಜಕ್ಕೂ ರಾಷ್ಟ್ರಪತಿಯವರು ಹೇಳಿಕೊಟ್ಟಂತೆ ಹೇಳಬೇಕು. ಅವರು `ಮೈ’ ಎಂದು ಪ್ರಾರಂಭ ಮಾತ್ರ ಮಾಡಿದ್ದರು) ತದನಂತರ ಒಬ್ಬೊಬ್ಬರಾಗಿ ೪೫ ಸದಸ್ಯರಿಗೆ ರಾಷ್ಟ್ರಪತಿಯವರು ಪ್ರಮಾಣವಚನ ಬೋಧಿಸಿದರು. ಕರ್ನಾಟಕದಿಂದ ಮೂವರಿಗೆ ಸಂಪುಟ ಸಚಿವರಾಗುವ ಭಾಗ್ಯ ದೊರೆತಿತು. ಮೊದಲಿಗೆ ಸದಾನಂದ ಗೌಡರು ಓಡೋಡಿ ಬಂದು ಆಂಗ್ಲದಲ್ಲಿ ಪ್ರಮಾಣ ವಚನ ಸ್ವೀಕರಿಸಿದರು. ಸದಾನಂದ ಗೌಡರು ಕನ್ನಡದಲ್ಲಿ ಪ್ರಮಾಣ ವಚನ ಸ್ವೀಕರಿಸಿಯಾರೆಂದು ನನಗೆ ಸಣ್ಣ ನಿರೀಕ್ಷೆ ಇತ್ತು. ಅದು ಹುಸಿಯಾಯಿತು. ಅನಂತಕುಮಾರ್ ಹಿಂದಿಯಲ್ಲಿ, ಸಿದ್ದೇಶ್ವರರು ಆಂಗ್ಲದಲ್ಲಿ ಪ್ರಮಾಣವಚನ ಕೈಗೊಂಡರು. ಯಾರಿಗೂ ಕನ್ನಡ ನೆನಪಿಗೇ ಬರದಿದ್ದುದಕ್ಕೆ ಅಶ್ಚರ್ಯವಿಲ್ಲ. ಹಾಗಿದೆ ಈಗ ಕನ್ನಡದ ಪರಿಸ್ಥಿತಿ.

DSCN8460

ಏಳು ಸ್ವರವು ಸೇರಿ ಸಂಗೀತವಾಯಿತು.  ಸಂಪುಟಕ್ಕೆ ಏಳು ಮಹಿಳೆ (ಸುಷ್ಮಾ ಸ್ವರಾಜ್, ಉಮಾಭಾರತಿ, ನಜ್ಮಾ ಹೆಪ್ತುಲ್ಲಾ, ಸ್ಮೃತಿ ಇರಾನಿ, ಹರ್ ಸಿಮ್ರತ್ ಕೌರ್, ನಿರ್ಮಲಾ ಸೀತಾರಾಮ್, ಮನೇಕಾಗಾಂದಿ)ಯರ ಸೇರ್ಪಡೆಯಾಗಿದೆ. ಹಾಗೇ ಈ ಏಳು ಮಹಿಳೆಯರು ಸೇರಿ ಏನು ಮಾಡುತ್ತಾರೆ ಎಂದು ಕಾದು ನೋಡೋಣ. ಸುಷ್ಮಾ ಸ್ವರಾಜ್ ಪ್ರಮಾಣ ವಚನ ಓದುವಾಗ ಮೈಕ್ ಅಡ್ಡವಾಗಿ ಅವರ ಮುಖವೇ ಕಾಣುತ್ತಿರಲ್ಲಿಲ್ಲ!

DSCN8443
ಎಲ್ಲರ ಪ್ರಮಾಣವಚನ ಸ್ವೀಕಾರ ಮುಗಿದು ರಾಷ್ಟ್ರಗೀತೆಯೊಂದಿಗೆ ಸಮಾರಂಭ ಮುಕ್ತಾಯವಾಯಿತು. ನಾನೊಬ್ಬಳೇ ಟಿವಿ ನೋಡುವುದೇಕೆಂದು ನಮ್ಮ ಅತ್ತೆಯವರು ಎನೋ ಪುಸ್ತಕ ಓದುತ್ತಿದ್ದವರನ್ನು ಕರೆದು ಟಿವಿ ಎದುರು ಕೂರಿಸುವಲ್ಲಿ ಸಫಲಳಾದೆ!

DSCN8450

Picture 130
ಪ್ರಧಾನಿಯವರ ಸಂಪುಟದಲ್ಲಿ ೭೫ ವರ್ಷ ಮೀರಿದವರಿಗೆ ಪ್ರವೇಶವಿಲ್ಲ. ಸಂಪುಟ ಸೇರ್ಪಡೆಗೊಂಡವರಲ್ಲಿ ನಜ್ಮಾ ಹೆಪ್ತುಲ್ಲಾ (೭೪) ಅವರೇ ಹಿರಿಯರು. ಇದು ನಿಜಕ್ಕೂ ಮೆಚ್ಚತಕ್ಕ ಅಂಶ.
ಮೋದಿ ಪ್ರಮಾಣವಚನ ಸ್ವೀಕರಿಸಿದ ತರುವಾಯ ಪ್ರಧಾನಿ ಸಚಿವಾಲಯ ವೆಬ್‌ಸೈಟ್ ಗೆ ಹೊಸ ರೂಪ ನೀಡಿದೆ http://pmindia.nic.in `ಭಾರತದ ಅಭಿವೃದ್ಧಿ ಯಾತ್ರೆಯನ್ನು ಹೊಸ ಎತ್ತರಕ್ಕೆ ಕೊಡೊಯ್ಯಲು ಕಟಿಬದ್ಧರಾಗಿರುವ ನಮಗೆ ನಿಮ್ಮ ಆಶೀರ್ವಾದ, ಬೆಂಬಲ, ಸಕ್ರಿಯವಾಗಿ ಪಾಲ್ಗೊಳ್ಳುವಿಕೆಯನ್ನು ಬೇಡುತ್ತಿದ್ದೇವೆ. ನಾವೆಲ್ಲ ಒಟ್ಟಾಗಿ ಭಾರತದ ಭವ್ಯ ಭವಿಷ್ಯವನ್ನು ಬರೆಯೋಣ’ ಇತ್ಯಾದಿ ಇರುವ ಸಂದೇಶವನ್ನು ಜಗತ್ತಿನ ಮಹಾಜನತೆಗೆ ರವಾನಿಸಿದ್ದಾರೆ.
****

ದೂರದರ್ಶನದಲ್ಲಿ ಪ್ರಸಾರವಾದ ಕೆಲವು ಚಿತ್ರಗಳ ಝಲಕ್. ಮಾಜೀ ಪ್ರಧಾನಿ ದೇವೇಗೌಡರು ಶುಭ್ರ ಬಿಳಿ ಪಂಚೆ ಕಣ್ಣು ಸೆಳೆಯಿತು.

DSCN8568

DSCN8424

DSCN8419

DSCN8398

DSCN8376

DSCN8410

DSCN8393 DSCN8380
೨೦೧೪ ಮೇ ೨೭ ಕನ್ನಡಪ್ರಭದ ಮುಖ ಪುಟ ವಿನ್ಯಾಸ ಬಲು ಸುಂದರವಾಗಿ ಮೂಡಿತ್ತು.  ಮೋದಿ ವೃಕ್ಷದ ರೆಂಬೆ ಕೊಂಬೆಗಳು ೪೫ ಸಚಿವರು.   ಮೋದಿಯವರು ಮೊಟ್ಟಮೊದಲ ಬಾರಿ ಸಂಸತ್ ಭವನಕ್ಕೆ ಕಾಲಿಟ್ಟಾಗ ಭಾವಪರವಶರಾದ ಸುದ್ದಿ ಚಿತ್ರ ಪತ್ರಿಕೆಗಳಲ್ಲಿ ಓದಿದೆ. ನಿಜಕ್ಕೂ ಇದು ಹೃದಯಸ್ಪರ್ಶಿಯೆನಿಸಿತು.  ಈ ನೋಟ ಎಂಥ ಕಠಿಣ ಹೃದಯಿಗಳನ್ನು ಭಾವಪರವಶಗೊಳಿಸಬಹುದು.  ಎಲ್ಲ ಭಾರತೀಯರ ಹೃದಯಕ್ಕೇ ಲಗ್ಗೆ ಇಟ್ಟ ದೃಶ್ಯವಿದು.

Picture 358

Picture 139ವಿದೇಶೀ ಬ್ಯಾಂಕ್ ಗಳಲ್ಲಿ ಕಪ್ಪುಹಣ ಹೊಂದಿಲ್ಲದಿರುವ ಎಲ್ಲ ಭಾರತೀಯರು ಈ ಕಪ್ಪುಹಣ ವಾಪಾಸ್ ಬರುತ್ತದೆ ಎಂಬ ಆಶಾಭಾವ ತಳೆದಿದ್ದಾರೆ.

Picture 094

ಪ್ರಧಾನಿಗಳ ಮೇಲೆ ಮತ್ತು ಅವರ ಸಚಿವ ಸಂಪುಟವರ್ಗದವರ ಮೇಲೆ ಜನ ಬಹಳ ನಿರೀಕ್ಷೆ ಹೊರಿಸಿದ್ದಾರೆ. ಅವರೆಲ್ಲರೂ ಜನರ ಆಶೋತ್ತರದ ಮಟ್ಟಕ್ಕೇರಿ ಬಹಳ ಸಮರ್ಥ ರೀತಿಯಲ್ಲಿ ಕೆಲಸ ಮಾಡಿ ಈ ದೇಶವನ್ನು ಅಭಿವೃದ್ಧಿಯತ್ತ ಕೊಂಡೊಯ್ದು ಭವ್ಯ ಭಾರತದೇಶದ ಹಿರಿಮೆಯನ್ನು ಎತ್ತಿ ಹಿಡಿಯಲಿ. ಅವರಿಗೆ ನಮ್ಮೆಲ್ಲರ ಸಹಕಾರವನ್ನೂ ಕೊಡೋಣ. ಭ್ರಷ್ಟಾಚಾರಮುಕ್ತ ದೇಶವಾಗಲು ಶ್ರಮಿಸೋಣ. ಭಾರತ ಮಾತೆಗೆ ಜಯವಾಗಲಿ.

 

Picture 140

Advertisements

Read Full Post »

ರಿಕ್ಷಾದಲ್ಲಿ ಪ್ರಯಾಣಿಸುವ ಸಂದರ್ಭ ಬಂದಾಗ ಹತ್ತಿದೊಡನೆ ಒಮ್ಮೆ ಚಾಲಕನನ್ನು ಅವಲೋಕಿಸುತ್ತೇನೆ. ಅವರ ಮುಖಭಾವ ನೋಡಿದಾಗ ಇಂಥವರನ್ನು ಮಾತಾಡಿಸಬಹುದು ಎಂದು ಅನಿಸುತ್ತದೆ. ಆಗ ಮಾತ್ರ ಅಂಥವರನ್ನು ಮಾತಾಡಿಸುತ್ತೇನೆ. ಹೀಗೆ ಇತ್ತೀಚೆಗೆ ಆಟೋದಲ್ಲಿ ಪ್ರಯಾಣಿಸಿದಾಗ, ರಿಕ್ಷಾ ಚಾಲಕನನ್ನು ಮಾತಾಡಿಸಿದೆ. ಹೇಗೆ ಈ ಸಲ ಚುನಾವಣೆಯಲ್ಲಿ ಯಾವ ಪಕ್ಷ ಗೆಲ್ಲಬಹುದು? ಎಂಬ ಪ್ರಶ್ನೆ ಎಸೆದೆ. ಮುಂದೆ ನಾನು ತಲಪುವ ಗಮ್ಯಸ್ಥಾನ ಬರುವವರೆಗೂ ನನಗೆ ಹೆಚ್ಚೇನೂ ಮಾತಾಡಬೇಕಾದ ಪ್ರಸಂಗ ಬರಲೇ ಇಲ್ಲ. ಅವರು ಆ ದಿನ ಆಡಿದ ಮಾತುಗಳ ಸಾರವನ್ನಿಲ್ಲಿ ಕೊಡುತ್ತೇನೆ.
ಕಾಂಗ್ರೆಸಿಗೆ ಇನ್ನು ಅಧಿಕಾರ ಕೊಟ್ರೆ ಆಯಮ್ಮ ನಮ್ಮ ದೇಶವನ್ನು ಮಾರಿಬಿಡುತ್ತಾರಷ್ಟೆ. ಈ ಸಲ ನೋಡೋಣ ಬಿಜೆಪಿಗೆ ಅಧಿಕಾರ ಕೊಟ್ಟು. ಚೆನ್ನಾಗೇ ಮಾಡುತ್ತಾರೆ ಕೆಲಸ. ಹಿಂದೆ ಯಡಿಯೂರಪ್ಪ ಅಧಿಕಾರದಲ್ಲಿದ್ದಾಗ ಒಳ್ಳೆ ಕೆಲಸ ಮಾಡಿದ್ದರು. ಶಿವಮೊಗ್ಗ ಚೆನ್ನಾಗಿ ಅಭಿವೃದ್ಧಿಗೊಂಡಿದೆ. ದುಡ್ಡು ಮಾಡಿಕೊಂಡ್ರು. ಅವರು ಮಾಡಿಕೊಂಡದ್ದು ಗೊತ್ತಾಗಿದೆ. ಕಾಂಗ್ರೆಸಿನವರು ಚಾಲಾಕಿಗಳು. ದುಡ್ಡುಮಾಡಿಕೊಂಡದ್ದು ಗೊತ್ತಾಗಲ್ಲ. ಮುಖ್ಯಮಂತ್ರಿಗಳವರು ಬಹಳ ಚಾಲಾಕು ಮತ್ತು ಹುಶಾರು. ಈಗ ನೋಡಿ ಮೈಸೂರಲ್ಲಿ ಯಾವ ರಸ್ತೆಯಲ್ಲಿ ಹೋಗಿ ರಸ್ತೆ ಚೆನ್ನಾಗಿದೆಯಾ ಹೇಳಿ? ನಮ್ಮ ಉಸ್ತುವಾರಿ ಸಚಿವರಿಗೆ ಆರೋಗ್ಯ ಚೆನ್ನಾಗಿಲ್ಲ. ಅವರಿಂದೇನು ಮಾಡಲು ಸಾಧ್ಯ? ಇನ್ನು ವಸತಿ ಸಚಿವರಿಗೆ ಒಂದು ಮೆಟ್ಟಲು ಹತ್ತಕ್ಕಾಗಲ್ಲ. ಅಂಥವರು ಏನು ಕೆಲಸ ಮಾಡಿಯಾರು? ಆರೋಗ್ಯ ಇಲ್ಲದಿದ್ದಮೇಲೆ ಕೆಲಸ ಮಾಡಲು ಹೇಗೆ ಸಾಧ್ಯ? ಆರೋಗ್ಯ ವಯಸ್ಸು ಇರುವವರು ನಿಲ್ಲಬೇಕು. ಇನ್ನು ರಾಜಕೀಯಕ್ಕೂ ವಯಸ್ಸಿನ ನಿರ್ಬಂಧ ಹಾಕಬೇಕು. ಆದರೆ ಎಸ್.ಎಂ. ಕೃಷ್ಣ ಚೆನ್ನಾಗೇ ಆರೋಗ್ಯವಾಗಿದ್ದಾರೆ. ಅಂಥವರು ನಿಲ್ಲಬಹುದು.
ನಾವೇನೋ ಚಾಮುಂಡೇಶ್ವರಿ ದಯದಿಂದ ಚೆನ್ನಾಗಿದ್ದೇವೆ ಮೇಡಂ. ನೀವು ನೋಡಬೇಕು ಬೊಂಬಾಯಿ, ಕಲ್ಕತ್ತ, ಉತ್ತರಪ್ರದೇಶದಲ್ಲಿ ಜನ ಜೀವನ ಮಾಡಲು ಎಷ್ಟು ಕಷ್ಟಪಡುತ್ತಿದ್ದಾರೆಂದು. ಇಲ್ಲಿ ರಸ್ತೆ ಬದಿ ಜ್ಯೂಸ್ ಮಾರುವವರನ್ನು ನೋಡಿದ್ದೀರಲ್ಲ. ಅವರು ಅಲ್ಲಿ ಜೀವನಾ ಮಾಡಲು ಸಾಧ್ಯವಾಗದೆ ಉತ್ತರಪ್ರದೇಶದಿಂದ ಇಲ್ಲಿಗೆ ವಲಸೆ ಬಂದವರು. ದೇಶ ಕಾಯುವ ಯೋಧರೂ ಕೂಡ ಕಷ್ಟಪಡುತ್ತಿದ್ದಾರೆ ಈ ಕೇಂದ್ರಸರ್ಕಾರದಿಂದ. ಅವರೂ ಮೋದಿ ಬರಲು ಕಾಯುತ್ತಿದ್ದಾರಂತೆ.
ಈ ಹಿಂದೆ ಕುಮಾರಸ್ವಾಮಿ ತಂದೆ ಮಾತು ಕೇಳಿ ಕೆಟ್ಟರು. ಅವರೋ ಎಲ್ಲಿ ನೋಡಿದ್ರೂ ನಿದ್ದೆ ಹೊಡೆಯುವುದೊಂದೆ ಕೆಲ್ಸ ಅವರಿಗೆ. ಆ ಸರ್ಕಾರ ಚೆನ್ನಾಗಿ ಕೆಲಸ ಮಾಡುತ್ತಿತ್ತು. ಒಪ್ಪಂದದಂತೆ ಯಡಿಯೂರಪ್ಪ ಅವರಿಗೆ ಅಧಿಕಾರ ಹಸ್ತಾಂತರ ಮಾಡಬೇಕಿತ್ತು. ಚೆನ್ನಾಗಿರುತ್ತಿತ್ತು ಆವಾಗ.
ಒಂದು ರೂಪಾಯಿಗೆ ಅಕ್ಕಿ ಕೊಟ್ಟರೆ ಏನು ಭಾಗ್ಯ? ಬಾಕಿ ಸಾಮಾನಿಗೆ ಅದೇನು ಬೆಲೆ ಏರಿಸಿದರು. ಜನ ಜೀವನ ಮಾಡಕ್ಕಾಗುತ್ತ? ಬರೀ ಅಕ್ಕಿ ತಿನ್ನಕ್ಕಾಗುತ್ತ?
ಇಷ್ಟು ಮಾತು ಆಗುವಾಗ ನಮ್ಮ ಮನೆ ಎದುರು ರಿಕ್ಷಾ ಬಂದೇಬಿಟ್ಟಿತು. ಛೇ ಇಷ್ಟು ಬೇಗ ಮನೆ ಬರಬೇಕೆ? ರಿಕ್ಷಾ ಚಾಲಕನ ಇನ್ನಷ್ಟು ಅನುಭವೀ ಪ್ರೌಢ ಮಾತುಗಳನ್ನು ಕೇಳಬಹುದಿತ್ತು ಎನಿಸಿತು. ಮೀಟರಿನಲ್ಲಿ ತೋರಿಸುವಷ್ಟೇ ದುಡ್ಡು ಕೊಡಬೇಕಾ ಅಲ್ಲ ಜಾಸ್ತಿಯಾ ಎಂದು ಕೇಳಿದೆ. ಮೀಟರಿನಲ್ಲಿ ತೋರಿಸಿದಷ್ಟೇ ಎಂದಾಗ ದುಡ್ಡು ಕೊಟ್ಟು ಧನ್ಯವಾದ ಹೇಳಿ ಇಳಿದೆ.
*******
ದುಡ್ಡು ತೆಗೆದುಕೊಳ್ಳುವ ATM ಕೇಂದ್ರಗಳು ಕೆಲವು ಈಗ ಬೆಳಗ್ಗೆ ೮ರಿಂದ ರಾತ್ರಿ ೮ರವರೆಗೆ ಮಾತ್ರ ತೆರೆದಿರುತ್ತವೆ. ಈ ಬಗ್ಗೆ ATM ನ ಒಬ್ಬ ಕಾವಲುಗಾರನನ್ನು ಪ್ರಶ್ನೆ ಮಾಡಿದೆ. `ರಾತ್ರಿ ೧೨ರನಂತರ ಬೇರೆ ಯಾರೂ ಬರುವುದಿಲ್ಲ. ಕೇವಲ ಕುಡುಕರು ಬರುತ್ತಾರಷ್ಟೆ. ಅವರಿಂದ ಸಾಕಷ್ಟು ತೊಂದರೆ ಆಗುತ್ತದೆ. ಅದಕ್ಕೆ ರಾತ್ರಿ ಬಾಗಿಲು ಹಾಕುವುದು’’
ಸಮಯ ನಿಗದಿಗೊಳಿಸಿದ್ದು ಬಹಳ ಒಳ್ಳೆಯದಾಯಿತು. ರಾತ್ರಿ ನಿದ್ದೆ ಕೆಡುವ ಕಷ್ಟ ತಪ್ಪಿತಲ್ಲ ಎಂದೆ. “ಹೌದು. ಆದರೆ ನಮ್ಮ ಸಂಬಳದಲ್ಲಿ ಕಡಿತ ಮಾಡುತ್ತಾರಂತೆ. ಇನ್ನು ದಿನಕ್ಕೆ ಆರು ಗಂಟೆ ಕೆಲಸ. ಹಿಂದೆ ೮ ಗಂಟೆ ಕೆಲಸ ಇತ್ತು’’
“ಎಷ್ಟು ಕೊಡುತ್ತಾರೆ?’’
“ಇದುವರೆಗೆ ಆರು ಸಾವಿರ ಕೊಡುತ್ತಿದ್ದರು. ಇನ್ನು ಐದು ಸಾವಿರ ಮಾತ್ರ ಕೊಡುತ್ತಾರೆ. ೮ ಗಂಟೆ ಕೆಲಸ ಮಾಡುತ್ತೇವೆ. ಸಂಬಳ ಕಡಿಮೆ ಮಾಡಬೇಡಿ ಎಂದು ನಾವು ಹೇಳಿದ್ದೇವೆ. ಏನು ಮಾಡುತ್ತಾರೋ? ನೋಡಬೇಕು. ನನಗೇನೂ ತೊಂದರೆ ಇಲ್ಲ. ೩ ಮಕ್ಕಳು ದುಡಿಯುತ್ತಾರೆ. ಕೆಲ್ಸ ಮಾಡಬೇಡ ಮನೆಯಲ್ಲಿರು ಎಂದಿದ್ದಾರೆ ನನಗೆ. ಆದರೆ ಮನೆಯಲ್ಲಿ ಕೂತು ಏನು ಮಾಡಲಿ ಎಂದು ಕೆಲಸ ಮಾಡುತ್ತಿರುವೆ. ಆದರೆ ಪಾಪ ಎಷ್ಟು ಮಂದಿಗೆ ಈ ಸೌಭಾಗ್ಯವಿದೆ. ಈಪಾಟಿ ಬೆಲೆ ಏರಿಕೆಯ ಈ ದಿನಗಳಲ್ಲಿ ಕೇವಲ ಐದು ಸಾವಿರದಲ್ಲಿ ಈಗ ಜೀವನ ಮಾಡಕ್ಕಾಗುತ್ತ?’’ ಎಂಬ ಮೂಲಭೂತ ಪ್ರಶ್ನೆ ಹಾಕಿದರು.
ಹೌದಲ್ಲ. ಜೀವನ ಮಾಡುವುದು ಕಷ್ಟವೇಸರಿ. ಅವರ ಮಾತನ್ನೇ ಮೆಲುಕು ಹಾಕುತ್ತ ಹೊರಬಂದೆ.

Read Full Post »

ಮೂಢನಂಬಿಕೆಗಳನ್ನು ನೀಷೇಧಿಸುವ ಕಾನೂನು ತರಬೇಕೆಂದು ಸರ್ಕಾರ ಘೋಷಿಸಿದ್ದೇ ಅದರ ಪರ ವಿರೋಧ ಬಿರುಸಿನ ಚರ್ಚೆಗಳು ಹರಿದದ್ದನ್ನು ಕಾಣುತ್ತೇವೆ. ಅಸಲಿಗೆ ಇಂಥದ್ದೆಕ್ಕೆಲ್ಲ ಕಾನೂನು ತಂದರೂ ನಾವು ಅದನ್ನು ಪಾಲಿಸುತ್ತೇವೆಯೇ ಎಂಬುದು ಮುಖ್ಯ ಪ್ರಶ್ನೆ.
ಸಾರ್ವಜನಿಕ ಸ್ಥಳಗಳಲ್ಲಿ ಧೂಮಪಾನ ನಿಷೇಧ ಕಾನೂನು ಬಂದು ವರ್ಷಗಳೇ ಉರುಳಿದುವು. ರಸ್ತೆ ರಸ್ತೆಗಳಲ್ಲಿ, ಅಂಗಡಿಮುಂದೆ ಧೂಮಪಾನಿಗಳು ರಾಜಾರೋಷವಾಗಿ ಧೂಮ ಕಕ್ಕುವುದನ್ನು ಕಾಣುತ್ತೇವೆ. ಎಲ್ಲೋಯಿತು ಕಾನೂನು? ಅದು ಶಾಸನದಲ್ಲಿ ಭದ್ರವಾಗಿ ಕುಳಿತಿದೆ!
ವಾಹನ ಓಡಿಸಲು ವ್ಯಕ್ತಿಗೆ ೧೮ ವರ್ಷ ತುಂಬಿದ ಬಳಿಕ ಪರವಾನಿಗೆ ಸಿಗುವುದು. ಆದರೆ ನಮ್ಮ ರಾಜ್ಯದಲ್ಲಿ ನೋಡಿ. ಸಣ್ಣ ಸಣ್ಣ ಮಕ್ಕಳು ಕೂಡ ಬೈಕ್, ಸ್ಕೂಟರ್ ಓಡಿಸುವುದನ್ನು ಕಾಣುತ್ತೇವೆ. ಇದು ಕಾನೂನಿನ ಅರಿವು ಇದ್ದೂ ಹೆತ್ತವರು ಮಾಡುವ ತಪ್ಪು.  ಕಾನೂನು ಮುರಿದು ಅವರ ಕೈಗೆ ವಾಹನ ಕೊಡುತ್ತಾರೆ. ೧೮ರ ಕೆಳಗಿನ ಮಕ್ಕಳು ಅತಿಯಾದ ವೇಗದಲ್ಲಿ ಬೈಕ್ ಓಡಿಸಿ ಪ್ರಾಣ ಕಳೆದುಕೊಂಡದ್ದನ್ನು ನಾವು ಆಗಾಗ ಪತ್ರಿಕೆಗಳಲ್ಲಿ ಓದುತ್ತಲೇ ಇರುತ್ತೇವೆ. ಆದರೂ ಆ ತಪ್ಪನ್ನು ಹೆತ್ತವರು ಮಾಡುತ್ತಲೇ ಇರುತ್ತೇವೆ.  ಶಿರಸ್ತ್ರಾಣ ಕಡ್ಡಾಯ ಎಂದಿದ್ದರೂ ನಾವು ಅದನ್ನು ಧರಿಸದೇ ವಾಹನ ಚಲಾಯಿಸುತ್ತೇವೆ. ಸಂಚಾರಿ ಆರಕ್ಷಕರ ಕಣ್ಣುತಪ್ಪಿಸುವ ಭರದಲ್ಲಿ ಎಲ್ಲೆಂದರಲ್ಲಿ ನುಗ್ಗಿಸಿ ಎಷ್ಟೋ ಪ್ರಾಣಾಪಾಯವಾದುದನ್ನೂ ಕಾಣುತ್ತಲೇ ಇರುತ್ತೇವೆ. ಏಕಮುಖ ರಸ್ತೆಯಲ್ಲಿ ವಿರುದ್ಧ ದಿಕ್ಕಿನಿಂದ ವಾಹನ ಚಲಾಯಿಸುತ್ತೇವೆ. ರಾತ್ರಿ ಹತ್ತರನಂತರ ಪಟಾಕಿ ಹೊಡೆಯಬಾರದು ಎಂದು ಕಾನೂನು ಜಾರಿಯಲ್ಲಿದ್ದರೂ ರಾತ್ರಿ ೧೨ ಆದರೂ ಪಟಾಕಿ ಸದ್ದು ಕೇಳುತ್ತಲೇ ಇರುತ್ತದೆ. ರಸ್ತೆಯಲ್ಲಿ ಎಲ್ಲೆಂದರಲ್ಲಿ ಕಸ ಹಾಕುವುದನ್ನು ಬಿಡುವುದಿಲ್ಲ. ಏಕೆ ಹೀಗೆ ನಾವು?
ಒಂದೆಡೆ ಮದ್ಯಪಾನ ಹಾಳು, ಮನೆ ನಾಶಪಡಿಸುತ್ತದೆ ಇತ್ಯಾದಿ ಘೋಷವಾಕ್ಯ ಬರೆಸಿ ಮದ್ಯಪಾನ ವಿರೋಧಿ ನೀತಿಪಾಟ ಹೇಳುವ ಸರ್ಕಾರ, ಆದರೆ ಈ ಸರ್ಕಾರದ ಬೊಕ್ಕಸ ತುಂಬಿರುವುದೇ ಈ ಮದ್ಯದಿಂದ!
ಸಿನಿಮಾಗಳಲ್ಲಿ ಧೂಮಪಾನ, ಮದ್ಯಪಾನ ಮಾಡುತ್ತ ಇರುವ ದೃಶ್ಯಗಳು ಪ್ರಸಾರವಾಗುವಾಗ ಕೆಳಗೆ ಧೂಮಪಾನ, ಮದ್ಯಪಾನ ಆರೋಗ್ಯಕ್ಕೆ ಹಾನಿಕರ ಎಂಬ ವಾಕ್ಯ ತಪ್ಪದೆ ಹಾಕುತ್ತಾರೆ!  ಅದು ಹಾಳು ಎಂದು ಗೊತ್ತಿದ್ದೂ ಸಿನಿಮಾದಲ್ಲೂ ಅಂಥ ದೃಶ್ಯ ತೋರಿಸುವ ಅಗತ್ಯ ಏನಿದೆ? ಎಂಥ ವಿಪರ್ಯಾಸವಿದು?
ಹೊರಗೆ ರಸ್ತೆಯಲ್ಲಿ ಗಲಾಟೆಯಿಂದ ಒಂದು ಮಧ್ಯರಾತ್ರಿ ಎಚ್ಚರವಾಯಿತು. ಏನೆಂದು ನೋಡಿದಾಗ ತಿಳಿದುಬಂದ ವಿಷಯ: ಮದ್ಯಪಾನ ಮಾಡಿ ಕಾರು ಚಲಾಯಿಸುತ್ತಿದ್ದ ಒಬ್ಬ ಮಹಾಶಯನನ್ನು ಪೋಲೀಸರು ತಡೆದು ವಿಚಾರಿಸಿ ಠಾಣೆಗೆ ಕರೆದೊಯ್ಯುವ ಹವಣಿಕೆಯಲ್ಲಿದ್ದರು.
ಈಗ ಬಹಳ ಸುದ್ದಿಯಲ್ಲಿರುವ ಸರ್ಕಾರದ ಶಾದಿಭಾಗ್ಯ ಯೋಜನೆ. ಈ ಯೋಜನೆಯ ದುರುಪಯೋಗವೇ ನಡೆದೀತಷ್ಟೇ ಹೊರತು ಅರ್ಹರಿಗೆ ಈ ಸೌಭಾಗ್ಯ ಸಿಗುವುದು ಕನಸಿನ ಮಾತೇ ಸರಿ. ಜಾತಿ ಮತ ಪಂಥವಿಲ್ಲದೆ ಬಡವರ್ಗದ  ಎಲ್ಲ ಜನರ ಸಾಮೂಹಿಕ ವಿವಾಹಕ್ಕೆ ಸರ್ಕಾರ ಹೆಚ್ಚಿನ ಒತ್ತು ಕೊಟ್ಟು ಈ ಯೋಜನೆಯನ್ನು ಕೈಗೊಂಡಿದ್ದರೆ ಸರ್ಕಾರ ನಿಜಕ್ಕೂ ಕಾಳಜಿಯಿಂದ ಈ ಕಾರ್ಯ ಕೈಗೆತ್ತಿಕೊಂಡಿದೆ ಎಂದು ತಿಳಿಯಬಹುದಿತ್ತು. ಆದರೆ ಸರ್ಕಾರವೇ ಜಾತಿಯನ್ನು ಎತ್ತಿಕಟ್ಟುವ ಹುನ್ನಾರದಲ್ಲಿ ಇದು ಬರೀ ಓಟು ಗಿಟ್ಟಿಸುವ ತಂತ್ರವೆಂದು ಯಾರು ಬೇಕಾದರೂ ಹೇಳಬಹುದು.
ಇಂಥ ಸಣ್ಣಪುಟ್ಟ ಕಾನೂನುಗಳನ್ನೇ ನಾವು ಪಾಲಿಸುವುದಿಲ್ಲ. ನಮ್ಮ ದೇಶದಲ್ಲಿ ಹೀಗೆ ಎಷ್ಟೆಷ್ಟೋ ಕಾನೂನುಗಳಿವೆ. ಅವೆಲ್ಲ ಶಾಸನಗಳಲ್ಲಿ ಪುಸ್ತಕಗಳಲ್ಲಿವಿಯೇ ಹೊರತು ಆಚರಣೆಯಲ್ಲಿ ಕಾಣುವುದಿಲ್ಲ. ಈಗ ತುರ್ತಾಗಿ ಆಗಬೇಕಾಗಿರುವುದು ನಾವು ಮೊದಲು ಕಾನೂನುಗಳನ್ನು ಗೌರವಿಸುವುದನ್ನು ಕಲಿಯೋಣ. ಕಾನೂನು ಬಗ್ಗೆ ನಮ್ಮ ಮಕ್ಕಳಿಗೆ ಅರಿವನ್ನು ತುಂಬೋಣ.
ಇವೆಲ್ಲ ಯಕ್ಷ ಪ್ರಶ್ನೆಗಳೇ? ಯಕ್ಷ ಪ್ರಶ್ನೆಗಳಿಗಾದರೂ ಧರ್ಮರಾಯ ಉತ್ತರ ಕೊಟ್ಟಿದ್ದಾನೆ. ಆದರೆ ಈ ಪ್ರಶ್ನೆಗಳಿಗೆ ಸಮರ್ಪಕವಾಗಿ ಯಾರು ಉತ್ತರಿಸುವರು?

Read Full Post »

ನಮ್ಮ ಮನೆ ಎದುರು ಒಳಚರಂಡಿ ಅಗೆದು ಪೈಪುಗಳನ್ನು ಹೊರತೆಗೆದು ಚೊಕ್ಕಗೊಳಿಸಿ ಪುನಃ ಅದೇ ಪೈಪುಗಳನ್ನು ಮರು ಜೋಡಿಸುವ ಕಾರ್ಯ ನಡೆದಾಗ ನೋಡಿದ ಘಟನೆಯನ್ನು ಇಲ್ಲಿ ವಿವರಿಸುವೆ.
ಒಂದು ಶುಕ್ರವಾರ ಬೆಳಗ್ಗೆ (ಹತ್ತು ಗಂಟೆ ಮೇಲೆಯೇ ಕೆಲಸಕ್ಕೆ ಬರುವುದು) ನಮ್ಮ ಮನೆ ಗೇಟು ಎದುರು ಅಗೆಯುವ ಕೆಲಸ. ಅದಕ್ಕೂ ಮೊದಲು ನಮ್ಮ ವಾಹನಗಳನ್ನು ರಸ್ತೆ ಬದಿ ಹೊರಗೆ ಇಟ್ಟಿದ್ದೆವು. ಸಂಜೆ ಒಳಗೆ ಮುಚ್ಚಿ ದಾರಿ ಬಿಟ್ಟು ಕೊಡುತ್ತೇವೆ ಎಂಬ ಆಶ್ವಾಸನೆ ಕೊಟ್ಟಿದ್ದರು. ಅಗೆಯುತ್ತ ಮರದ ಬೇರು ಪೈಪ್ ಮೇಲೆಯೇ ಕೂತಿತ್ತು. ಅದನ್ನು ಕಡಿದು ತೆಗೆಯಲು ಸಾಕಷ್ಟು ಬೆವರು ಹರಿಸಬೇಕಾಯಿತು. ಹಾಗಾಗಿ ಸಂಜೆಗೆ ಚರಂಡಿ ಮುಚ್ಚಲು ಅವರಿಂದ ಸಾಧ್ಯವಾಗಲಿಲ್ಲ. ನಾಳೆ ಬೆಳಗ್ಗೆ ಬಂದು ಮೊದಲು ಮಾಡಿ ಕೊಡುತ್ತೇವೆ. ಇವತ್ತೊಂದು ದಿನ ಹೇಗೋ ಸುಧಾರಿಸಿ ಎಂದು ತೆರಳಿದರು. ನಮ್ಮ ಮನೆಗೆ ಬರಲು ತೋಡಿದ ಗುಂಡಿ ಹಾರಿಯೇ ಬರುವ ಹಾಗಾಯಿತು. ವಯಸ್ಸಾದವರು ನಮ್ಮ ಮನೆ ಕಡೆ ಸುಳಿಯಲಿಲ್ಲ ೩ ದಿನ!  ನಮ್ಮ ವಾಹನಗಳನ್ನು ಬೇರೆಯವರ ಮನೆ ಅಂಗಳದಲ್ಲಿ ನಿಲ್ಲಿಸಿದೆವು.

DSCN4132

 ಶನಿವಾರ ಕೆಲಸಕ್ಕೇ ಬರಲಿಲ್ಲ! ಆದಿತ್ಯವಾರ ಹೇಗೂ ರಜಾದಿನ. ಅಂತೂ ಸೋಮವಾರ ಕೆಲಸಕ್ಕೆ ಬಂದರು. ಶನಿವಾರ ಏಕೆ ಬರಲಿಲ್ಲ ಎಂದು ಕೇಳಿದ್ದಕ್ಕೆ `ನಮ್ಮ ಗುತ್ತಿಗೆದಾರರ ನೆಂಟರೊಬ್ಬರು ತೀರಿ ಹೋಗಿದ್ದರು. ಹಾಗೆ ಗುತ್ತಿಗೆದಾರರು ಬರಲಿಲ್ಲವಲ್ಲ. ಅವರು ಕೆಲಸ ನೋಡಬೇಕಲ್ಲ. ಹಾಗಾಗಿ ನಾವು ಕೆಲಸಕ್ಕೆ ಬಂದಿಲ್ಲ ಎಂಬ ಸಮಜಾಯಿಸಿ ಕೊಟ್ಟರು. ಸಂಜೆ ಪೈಪ್ ತೆಗೆದು ಅದರೊಳಗಿದ್ದ ಗಟ್ಟಿಯಾದ ಕೆಸರು ಹೆರೆದು ತೆಗೆದು ಪುನಃ ಪೈಪ್ ಜೋಡಿಸಿ ದಾರಿಗೆ ಮಣ್ಣು ತುಂಬಿದರು. ಅದೇ ರಾತ್ರಿ ಧಾರಾಕಾರವಾಗಿ ಮಳೆ ಸುರಿದು ಮಣ್ಣು ಒಂದಡಿ ಕುಸಿಯಿತು. ಮಾರನೇ ದಿನ ಅಲ್ಲಿಗೆ ಮಣ್ಣುತುಂಬಿ ಚಪ್ಪಡಿಕಲ್ಲು ಹಾಕಿ ದಾರಿಯನ್ನು ಕಾರು ಹೋಗುವಂತೆ ನೇರ್ಪುಗೊಳಿಸಿದರು. ಮತ್ತೊಂದು ದಿನವೂ ಮಳೆ ಸುರಿದು ಮಣ್ಣು ಕೊಚ್ಚಿಹೋಗಿದೆ. ಅದನ್ನು ಸರಿ ಮಾಡಿಕೊಡಿ ಅಂದರೆ ನೀವು ಕಾಫಿಗೂ ದುಡ್ಡು ಕೊಟ್ಟಿಲ ಎಂಬ ಉತ್ತರ. ಅವರೋ ಆರೇಳು ಮಂದಿ ಇದ್ದರು.

DSCN4455          DSCN4454

ಆ ಕೆಲಸಗಾರರು ಮಾಡುವ ಕೆಲಸ ನೋಡಿದರೆ ಬೇಸರವಾಗುತ್ತದೆ. ಅವರು ಮಾಡುವ ಕೆಲಸಕ್ಕೆ ಕೈಗೆ ಕವಚ ಇಲ್ಲದೆ ಬರೀಗೈಯಲ್ಲಿ ಹೊಲಸು ತುಂಬಿದ ಪೈಪನ್ನು ಎತ್ತಿ ಚೊಕ್ಕಗೊಳಿಸಿ ಪುನಃ ಜೋಡಿಸಬೇಕು. ಕಾಲಿಗೇನೋ ಗಮ್ ಬೂಟನ್ನು ಕೊಟ್ಟಿದ್ದಾರೆ. ಚರಂಡಿಯಲ್ಲಿ ನೀರು ಹರಿಯುತ್ತಲೇ ಇರುವಾಗ ಈ ಕೆಲಸ ಮಾಡಬೇಕು ಅವರು. ಒಳಚರಂಡಿ ಕೆಲಸಕ್ಕೆ ಕಾರ್ಮಿಕರನ್ನು ಗುಂಡಿಗೆ ಇಳಿಸಬಾರದು ಇತ್ಯಾದಿ ಸರ್ಕಾರ ಒಂದು ಕಡೆ ಬೊಬ್ಬೆ ಹೊಡೆಯುತ್ತಲೇ ಎಚ್ಚರ ಕೊಡುತ್ತದೆ. ಆದರೆ ಇಲ್ಲಿ ರಾಜಾರೋಷವಾಗಿ ಕೈಗೆ ಕೈಗವುಸು ಕೊಡದೆಯೇ ಅವರಿಂದ ಗುತ್ತಿಗೆಯಾಧಾರದಲ್ಲಿ ಕೆಲಸ ಮಾಡಿಸುವುದು ಕಾಣುತ್ತದೆ.  ಕೈ ಗವುಸು ಕೊಟ್ಟಿಲ್ಲವಾ ಎಂದು ಕಾರ್ಮಿಕರನ್ನು ಕೇಳಿದರೆ ಅವರು ಮುಖ ಮುಖ ನೋಡುತ್ತಾರೆ ಹೊರತು ಉತ್ತರ ಕೊಡುವುದಿಲ್ಲ.

DSCN4145

DSCN4144

DSCN4143
ಚರಂಡಿ ತೋಡುವ ಭರದಲ್ಲಿ ಬಿ‌ಎಸ್‌ಎನ್‌ಎಲ್ ನಿಗಮದ ಕೇಬಲ್ ವಯರು ಎರಡು ಸಲ ತುಂಡಾಗಿತ್ತು. ಎರಡು ಸಲವೂ ಅದೂ ಸರಿಯಾಗಿ ಶನಿವಾರವೇ ತುಂಡಾಗಿ ನಮಗೆ ದೂರವಾಣಿಯ ಸೌಲಭ್ಯ ಇರದಂತೆ ಮಾಡಿತು. ಬಿ‌ಎಸ್‌ಎನ್‌ಎಲ್‌ನ ಸಿಬ್ಬಂದಿ ನಾವು ಕೊಟ್ಟ ದೂರನ್ನು ಸ್ವೀಕರಿಸಿ ಕ್ಷಿಪ್ರವಾಗಿ ರಿಪೇರಿ ಮಾಡಿಕೊಟ್ಟರು. ಕೇಬಲ್ ವಯರುಗಳನ್ನು ನೆಲದಡಿ ಅಡ್ಡಾದಿಡ್ಡಿ ಹಾಕಿದ್ದಾರೆ.  ದೊಡ್ಡ ಕೊಳವೆ ಹಾಕಿ ಅದರೊಳಗೆ ವಯರು ತೂರಿಸಿದ್ದರೆ ಇಂಥ ಪ್ರಸಂಗ ಎದುರಾಗುತ್ತಿರಲಿಲ್ಲ. ನಮ್ಮ ಮನೆ ಎದುರು ಕೆಲಸ ಮಾಡುವಾಗ  ಕೇಬಲ್ ವಯರು ಜಾಗ್ರತೆ. ಅದನ್ನು ಮೊದಲೇ ಬದಿಗೆ ಸರಿಸಿ ಕೆಲಸ ಮಾಡಿ ಎಂದು ಅವರಿಗೆ ಆಗಾಗ ಹೇಳುತ್ತಲಿದ್ದೆ. ಹಾಗಾಗಿ ಮತ್ತೆ ತುಂಡಾಗಲಿಲ್ಲ ವಯರು.
ಹೀಗೆ ಚರಂಡಿಯ ಮಣ್ಣು ತೋಡುವಾಗ ನೀರಿನ ಪೈಪ್ ಒಂದು ಕಡೆ ಒಡೆದು ನೀರು ಸಣ್ಣಗೆ ಸೋರುತ್ತಿತ್ತು. ಮೂರು ದಿನವಾದರೂ ಅದನ್ನು ಸರಿ ಮಾಡದೆ ಇದ್ದದ್ದನ್ನು ಕಂಡು ಅದಕ್ಕೆ ಸಂಬಂಧಪಟ್ಟ ಒಂದು ಸಂಖ್ಯೆಗೆ ದೂರುವಾಣಿಸಿದೆ. `ನಿಮ್ಮ ಮನೆಗೆ ನೀರು ಸರಬರಾಜಾಗುವ ಪೈಪೇ ಅದು? ಯಾರು ಒಡೆದಿದ್ದಾರೋ ಅವರಿಗೇ ದೂರು ಕೊಡಿ’ ಎಂಬ ಉತ್ತರ ಬಂತು. ನಮ್ಮ ಮನೆಗೆ ಬರುವ ನೀರಿನ ಪೈಪ್  ಅಲ್ಲ, ಇನ್ನು ನಿಮ್ಮ ಇಷ್ಟ. ಈಗ ಮಣ್ಣು ಮುಚ್ಚುವ ಮೊದಲೇ ಆದರೆ ನಿಮ್ಮ ಕೆಲಸ ಕಡಿಮೆ. ಮಣ್ಣು ಮುಚ್ಚಿದಮೇಲೆ ಮತ್ತೆ ನೀವು ಬಂದು ಗುಂಡಿ ತೋಡಬೇಕಾದೀತು. ನಾನು ಹೇಳುವುದು ಹೇಳಿದ್ದೇನೆ ಇನ್ನು ನೀವು ಏನು ಬೇಕಾದರೂ ಮಾಡಿ ಎಂದು ಹೇಳಿ ಕೈದುಗೊಳಿಸಿದೆ. ಸ್ವಲ್ಪ ಹೊತ್ತು ಬಿಟ್ಟು ನಮ್ಮ ಮನೆ ದೂರವಾಣಿ ಕಿರುಗುಟ್ಟಿತು. ಪೈಪ್ ಒಡೆದಿದ್ದು ಎಲ್ಲಿ ಇತ್ಯಾದಿ ವಿವರ ಕೇಳಿದರು. ಅಂತೂ ಮಣ್ಣು ಮುಚ್ಚುವ ಮೊದಲೇ ಅವರು ಬಂದು ಒಡೆದ ಪೈಪ್ ಸರಿ ಮಾಡಿದರು.

ಕೇಬಲ್ ವಯರು ತುಂಡಾಗಿ ಬದಿಯಲ್ಲಿ ಬೀಸಾಕಿರುವುದನ್ನು ಈ ಚಿತ್ರದಲ್ಲಿ ಕಾಣಬಹುದು.

ಕೇಬಲ್ ವಯರು ತುಂಡಾಗಿ ಬದಿಯಲ್ಲಿ ಬೀಸಾಕಿರುವುದನ್ನು ಈ ಚಿತ್ರದಲ್ಲಿ ಕಾಣಬಹುದು.

DSCN3781

  ಮಾಡುವ ಕೆಲಸವನ್ನು ಶ್ರದ್ಧೆಯಿಂದ ಅಚ್ಚುಕಟ್ಟಾಗಿ ಮಾಡಿದರೆ ಇಂಥ ತೊಡರುಗಳು ಎದುರಾಗುವುದನ್ನು ತಪ್ಪಿಸಬಹುದು. ಬೇಕಾಬಿಟ್ಟಿ ಮಾಡಿದರೆ ಒಂದಕ್ಕೆರಡು ಖರ್ಚು ಆಗುತ್ತಲೇ ಇರುತ್ತದೆ. ಚರಂಡಿ ಮಣ್ಣು ತೋಡಿದ ಜಾಗದಲ್ಲಿ ಕಲ್ಲುಚಪ್ಪಡಿ ಹಾಕಬೇಕಷ್ಟೆ. ಅದನ್ನು ಇನ್ನು ಯಾವಾಗ ಹಾಕುತ್ತಾರೊ? ಚಪ್ಪಡಿಕಲ್ಲುಗಳು ದಾರಿಯಲ್ಲಿ ಅಲ್ಲಲ್ಲಿ ಬಿದ್ದಿವೆ. ಕೆಲವು ನೀರು ಹರಿಯುವ ಸಣ್ಣ ಚರಂಡಿಯೊಳಗೂ ಬಿದ್ದಿವೆ. ಯಾರಿಗೆ ಹೇಳೋಣ ಈ ಸಮಸ್ಯೆಗಳನ್ನು?

Read Full Post »

ಒಂದು ಬೆಳಗ್ಗಿನ ೧೦ಗಂಟೆ ಸಮಯಕ್ಕೆ ಭೂಮಿ ನಡುಗಿಸುವ ಸದ್ದು. ಭೂಕಂಪನವಾಯಿತೆ? ಎಂಬ ದಿಗಿಲಿನಿಂದ ಮನೆಯಿಂದ ಹೊರಗೆ ಬಂದು ನೋಡಿದಾಗ ಕಂಡ ದೃಶ್ಯದಿಂದ ಆ ಕೂಡಲೇ ಅನಿಸಿದ್ದು, ಭೂಕಂಪನವಾದರೂ ಆದೀತು ಆದರೆ ಈ ಕೊಳವೆಬಾವಿ ಕೊರೆಯುವುದು ಬೇಡವೇ ಬೇಡ ಎಂದು.
ನಮ್ಮ ಮನೆ ಎದುರು ಭಾಗದಲ್ಲಿ ಇರುವ ಖಾಲಿ ಸೈಟಿನಲ್ಲಿ ಕೊಳವೆಬಾವಿ ಕೊರೆಯಲು ಪ್ರಾರಂಭಿಸಿದ್ದರು. ಅದೇ ಭೀಕರ ಸದ್ದು ಕೇಳಿಸಿದ್ದು. ಛಾಯಾಚಿತ್ರ ತೆಗೆದೆ. ಕೊರೆಯುವ ಜಾಗ ಕಾಣದಷ್ಟು ಧೂಳು ಎದ್ದ ದೃಶ್ಯ ಕಾಣಿಸಿತಷ್ಟೆ. ಕಲ್ಲು ಕೊರೆತದ ಧೂಳಿನಿಂದ ಸುತ್ತಮುತ್ತ ಯಾರನ್ನೂ ಕಾಣುತ್ತಿರಲಿಲ್ಲ. ಆ ಪ್ರದೇಶವೆಲ್ಲ ಧೂಳುಮಯ. ಬೆಳಗ್ಗೆ ೧೦ರಿಂದ ಮಧ್ಯಾಹ್ನ ೩ರತನಕ ನಿರಂತರ ಕೊರೆತ. ಅಷ್ಟು ಸಮಯ ಶಬ್ದ, ಧೂಳು ಮಾಲಿನ್ಯ ಸಹಿಸಲೇ ಬೇಕಾಯಿತು. ಆ ಸೈಟಿನ ಅಕ್ಕಪಕ್ಕ ಇರುವ ಜಾಗದಲ್ಲಿ ಈಗಾಗಲೇ ಕೊಳವೆಬಾವಿ ಕೊರೆದಿದ್ದಾರೆ! ಗಮನಿಸಿ ಅಂಗೈ ಅಗಲದ ಸ್ಥಳದಲ್ಲಿ ಎಷ್ಟೊಂದು ಕೊಳವೆಬಾವಿಗಳು?
ಹೀಗೆ ಎಲ್ಲೆಂದರಲ್ಲಿ ಕೊಳವೆಬಾವಿ ಕೊರೆಯಲು ಪರವಾನಿಗೆ ಇತ್ತರೆ ಮುಂದೆ ಭೂಮಿತಾಯಿ ಸಂಕಟಪಡುವ ದಿನ ದೂರವಿಲ್ಲ. ಧರಿತ್ರಿಯೊಡನೆ ನಿಕಟ ಸಂಬಂಧವಿರುವ ಮನುಜ ಕೂಡ ಇದರಿಂದ ಪರಿತಪಿಸಬೇಕಾಗುತ್ತದೆ. ಕೊಳವೆಬಾವಿಗಳಿಗೆ ಬೇಕೇಬೇಕು ಕಡಿವಾಣ. ಈಗಾಗಲೇ ಅಂತರ್ಜಲ ಬತ್ತಿ ಪಾತಾಳಕ್ಕೆ ಹೋಗಿದೆ. ಪಾತಾಳ ಮುಟ್ಟಿದರೂ ನೀರು ಮರೀಚಿಕೆಯಾಗಿದೆ. ಕೆರೆತೊರೆಗಳು ಬತ್ತಿ ಕಾಡುಪ್ರಾಣಿಗಳಿಗೆ ನೀರಿಲ್ಲದೆ ಇರುವ ಬಗ್ಗೆ ಹಾಹಾಕಾರ ಸ್ಥಿತಿ ಏರ್ಪಟ್ಟಿದೆ. ಪೇಟೆಯಲ್ಲಿ ಮನೆಕಟ್ಟುವ ಮಂದಿ ಕಡ್ಡಾಯವಾಗಿ ಮಳೆನೀರು ತೊಟ್ಟಿ ನಿರ್ಮಿಸಲಿ. ಕೊಳವೆಬಾವಿ ಕೊರೆಯುವ ಬದಲು ನಿಸರ್ಗದತ್ತವಾಗಿ ಸುರಿಯುವ ಮಳೆ ನೀರನ್ನು ಶೇಖರಿಸಿ ಉಪಯೋಗಿಸಲಿ. ಈಗ ಮಳೆನೀರ ತೊಟ್ಟಿ ಕಡ್ಡಾಯ ಎಂದು ಹೇಳುತ್ತಾರಷ್ಟೆ. ಅದು ಕಡತದಲ್ಲಿ ಮಾತ್ರವಷ್ಟೇ ಉಳಿದಿರಬೇಕು. ಆದರೆ ಇತ್ತೀಚೆಗೆ ಕಟ್ಟಿಸಿರುವ ಮನೆಗಳನ್ನು ಸರ್ವೆ ಮಾಡಿದರೆ ಆಗ ಗೊತ್ತಾಗುತ್ತದೆ ಎಷ್ಟು ಮನೆಗಳವರು ಮಳೆನೀರಿನ ತೊಟ್ಟಿ ಕಟ್ಟಿಸಿದ್ದಾರೆ ಎಂಬುದಾಗಿ.  ನಗರ ಪ್ರದೇಶದಲ್ಲಿ ವಾಸಿಸುವ ಮಂದಿಗೆ ಕೊಳವೆಬಾವಿ ಕೊರೆಯಲು ಆಸ್ಪದ ಕೊಡಬಾರದು. ಈ ವಿಷಯವಾಗಿ ಸಂಬಂಧಪಟ್ಟವರು ತುರ್ತು ಕ್ರಮ ಕೈಗೊಳ್ಳಬೇಕು.
ಈ ವರ್ಷ ಬಿಸಿಲಿನ ಕಾವು ದಿನೇ ದಿನೇ ಏರುತ್ತಿದೆ. ದೊಡ್ದದೊಡ್ದ ಮರಗಳು ಕೂಡ ಬಿಸಿಲಿಗೆ ಬಸವಳಿಯುವುದನ್ನು ಕಾಣುತ್ತೇವೆ. ದಾಸವಾಳ, ಚಿಕ್ಕು, ಪೇರಳೆ ಮರಗಳಿಗೆ ನಿಜಕ್ಕೂ ನೀರಿನ ಅವಶ್ಯ ಬೀಳುವುದಿಲ್ಲ. ಈ ಸಲ ಅವುಗಳು ಕೂಡ ನೀರು ಕೇಳುತ್ತಿವೆ. ಅಂತರ್ಜಲ ಯಾವ ಮಟ್ಟಕ್ಕೆ ಮುಟ್ಟಿದೆ ಎಂಬುದಾಗಿ ಅದರಿಂದಲೇ ಮನಗಾಣಬಹುದು. ಮಾನವ ಇನ್ನಾದರೂ ಎಚ್ಚರಗೊಳ್ಳದಿದ್ದರೆ ಮುಂದೆ ನೀರಿಗಾಗಿ ಪರಿತಪಿಸುವ ದಿನ ದೂರವಿಲ್ಲ.

OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA

Read Full Post »

 ಭ್ರಷ್ಟಾಚಾರ ಎಂಬುದು ಇಂದು ನಿನ್ನೆಯದಲ್ಲ. ಕಳೆದ ನೂರಾರು ವರ್ಷಗಳಿಂದಲೇ ಅದು ವ್ಯಾಪಕವಾಗಿ ಬೇರು ಇಳಿಸಿದೆ. ಡಿ.ವಿ.ಜಿ ಕೃತಿ ಶ್ರೇಣಿ (ಸಂಪುಟ ೪, ಪುಟಸಂಖ್ಯೆ ೨೨-೨೪ರಲ್ಲಿ) ಬರುವ ಈ ಸಾಲನ್ನು ಗಮನಿಸಿ: ೧೮೫೫ರಲ್ಲಿ ರಂಗಾಚಾರ್ಯರು ಅವರ ೨೫ನೆಯ ವಯಸ್ಸಿನಲ್ಲಿ ಬರೆದ “ಬ್ರೈಬರಿ”, “ಲಂಚ” ಎಂಬ ಹೆಸರುಳ್ಳ ಆ ಲೇಖನದಲ್ಲಿ ದೇಶೀಯ ಅಧಿಕಾರಿಗಳು ನಡೆಸುತ್ತಿದ್ದ ಅನ್ಯಾಯ ಅಕ್ರಮಗಳನ್ನು ರಂಗಾಚಾರ್ಯರು ನಿರ್ದಾಕ್ಷಿಣ್ಯವಾಗಿ ಹೊರಹಾಕಿದರು. ಆ ಪುಸ್ತಕದ ಮುಖ್ಯಾಂಶಗಳನ್ನು ಸಂಕ್ಷೇಪವಾಗಿ ಇಲ್ಲಿ ನೋಡಬಹುದು: ಲಂಚ ಪ್ರಧಾನವಾಗಿರುವುದಕ್ಕೆ ೧) ಅಲ್ಪ ವೇತನ ೨) ವಿದ್ಯಾವಂತರೂ ಗುಣಾಢ್ಯರೂ ಆದ ಜನರು ಅಧಿಕಾರಿ ವರ್ಗದಲ್ಲಿ ತಕ್ಕಷ್ಟು ಮಂದಿ ಇಲ್ಲದಿರುವಿಕೆ ೩) ಇಲಾಖೆಯ ಕಾರ್ಯಕ್ರಮದ ದೋಷಗಳು ೪) ದೊಡ್ಡ ಅಧಿಕಾರಿಗಳ ವಿಚಾರ ಶೂನ್ಯತೆ — ಇವೇ ಮುಖ್ಯ ಕಾರಣಗಳು. ಅಧಿಕಾರಿಗಳು ಲಂಚ ಕೋರರಾಗಿದ್ದರೆ, ಸರಕಾರದ ಕ್ರಮವೇ ಉಚಿತ ರೀತಿಯಲ್ಲಿ ಇಲ್ಲವೆಂದು ಅರ್ಥವಾಗುವುದು. ರಾಜ್ಯ ಪರಿಪಾಲನಾ ಕ್ರಮದಲ್ಲಿ ವಿಚಕ್ಷಣೆ ಇದ್ದರೆ ಲಂಚ ತೆಗೆಯುವವರಿಗೆ ಅವಕಾಶವೇ ದೊರೆಯದು. ಲಂಚವು ಕೊಟ್ಟು ತೆಗೆಯುವವರಿಬ್ಬರ ನಡೆವಳಿಕೆಯನ್ನು ಮಾತ್ರವಲ್ಲದೆ ಜನಸಾಮಾನ್ಯರ ಪ್ರಾಮಾಣಿಕತೆಯನ್ನು ನ್ಯಾಯಪರತೆಯನ್ನು ಕೆಡಿಸುತ್ತದೆ. ರಾಜದ್ರೋಹ ಪ್ರಜಾದ್ರೋಹಗಳೆರಡಕ್ಕೂ ಆಕರವಾದ ಲಂಚಕೋರತನ ಹೋಗಬೇಕಾದರೆ– ಸರಕಾರೀ ಕೆಲಸಗಳಿಗೆ ಜನರನ್ನು ಆರಿಸುವಾಗ ಅವರ ಯೋಗ್ಯತಾ ಪರೀಕ್ಷೆಯನ್ನು ಮಾಡಬೇಕು. ಜಾತಿ ಪಕ್ಷಪಾತ ಮತ ಪಕ್ಷಪಾತಗಳನ್ನು ಬಿಟ್ಟಿರಬೇಕು. ಪ್ರಮೋಷನ್ ಅಥವಾ ವೇತನ ವೃದ್ಧಿಯನ್ನು ಕೊಡುವ ಸಂದರ್ಭದಲ್ಲಿ ಜನರು ಹಿಂದಿನ ಕೆಲಸಗಳಲ್ಲಿ ತೋರಿಸಿದ ಮೆಹನತ್ತು, ಪ್ರಾಮಾಣಿಕತೆ, ಔದಾಸೀನ್ಯ, ಅಥವಾ ಅವಿವೇಕತೆ — ಇವುಗಳನ್ನು ವಿಚಾರಿಸಿ ಅದಕ್ಕೆ ತಕ್ಕಂತೆ ನಡೆಯಬೇಕು. ಅಧಿಕಾರಿಗಳನ್ನು ಸ್ಥಳದಿಂದ ಸ್ಥಳಕ್ಕೆ ವ್ಯರ್ಥವಾಗಿ ವರ್ಗಾಯಿಸಬಾರದು, ನಿಷ್ಕಾರಣವಾಗಿ ಹಿಂಸಿಸಬಾರದು. ಕೆಲಸವು ಸಮರ್ಪಕವಾಗಿದ್ದಲ್ಲಿ, ಅವರಿಗೆ ವೇತನವೃದ್ಧಿಯು ನಿರಾತಂಕವಾಗಿ ದೊರೆಯುವಂತಿರಬೇಕು. ಬಹುಕಾಲವಾದರೂ ಆದಾಯ ಹೆಚ್ಚಾಗದಿದ್ದರೆ ಎಂಥವರಿಗೂ ಬೇಸರ ಅತೃಪ್ತಿಗಳು ಹುಟ್ಟುವುದು ಸ್ವಾಭಾವಿಕ. ಮೇಲಣ ಅಧಿಕಾರಿಗಳು ತಮ್ಮ ಮುನಷಿ ಗುಮಾಸ್ತರುಗಳು ಹೇಳಿದಂತೆ ನಡೆದುಕೊಳ್ಳುವವರಾಗದೆ, ಸ್ವಂತ ಕಾಗದ ಪತ್ರಗಳನ್ನು ಪರಾಮರ್ಶಿಸಿ, ಆಡಳಿತಗಳಲ್ಲಿ ಸೂಕ್ಷ್ಮ ದೃಷ್ಟಿಯನ್ನಿರಿಸಬೇಕು. ಅವರು ಕೈಕೆಳಗಿನವರ ಅಧೀನರಾದರೆ ಆ ಕೀಳ್ತರದ ಜನರು ಲಂಚಕ್ಕೆ ಒಳಗಾಗುವುದು ಆಶ್ಚರ್ಯವಲ್ಲ. ಎಲ್ಲಕ್ಕಿಂತ ಹೆಚ್ಚಾಗಿ ಪ್ರಜೆಗಳು– ಎಂದರೆ ಅವರ ಮುಖಂಡರು ರಾಜ್ಯದ ಯೋಗಕ್ಷೇಮಗಳಿಗೆ ಸಂಬಂದಪಟ್ಟ ವಿಷಯಗಳನ್ನು ಸರ್ವದಾ ಲಕ್ಷ್ಯದಲ್ಲಿರಿಸಿ, ತಮ್ಮ ಅಭಿಪ್ರಾಯಗಳನ್ನು ಸಭೆ, ವೃತ್ತಪತ್ರಿಕೆಗಳ ಮೂಲಕ ಪ್ರಕಟ್ರಗೊಳಿಸಿ, ಅಧಿಕಾರಿಗಳ ನಡವಳಿಕೆಗಳ ವಿಷಯದಲ್ಲಿ ನಿಗ್ರಹಾನುಗ್ರಹಗಳನ್ನು ಪದೇ ಪದೇ ತೋರಬೇಕು. ಹಾಗಾದ ಹೊರತು ರಾಜ್ಯ ವ್ಯವಸ್ಥೆಯು ಸರಿಯಾಗದು.

     ಇದು ಎಂಥ ಸೋಜಿಗವಯ್ಯ. ನೂರಾರು ವರ್ಷಗಳ ಹಿಂದೆಯೂ ಲಂಚ ರುಷುವತ್ತುಗಳು ಇದ್ದುವು ಎಂದಾಯಿತು. ಈಗ ಅದು ಇನ್ನೂ ಆಳಕ್ಕೆ ಇಳಿದಿದೆ. ಇದನ್ನು ಓದುವಾಗ ಆಶ್ಚರ್ಯವಾಗುತ್ತದೆ. ಎಷ್ಟು ಸರಳವಾಗಿ ವಿಚಾರಾತ್ಮಕವಾಗಿ ರಂಗಾಚಾರ್ಯರು ಲಂಚದ ಬಗ್ಗೆ ಹೇಳಿಕೆ ಕೊಟ್ಟಿದ್ದಾರೆ. ಇದರಂತೆ ನಮ್ಮ ರಾಜಕಾರಣಿಗಳು, ಅಧಿಕಾರಿಗಳು ತಪ್ಪದೆ ನಡೆದುಕೊಂಡರೆ ನಮ್ಮ ರಾಜ್ಯ ರಾಮರಾಜ್ಯವಾಗುವುದರಲ್ಲಿ ಸಂಶಯವಿಲ್ಲ. ಇದಕ್ಕೆ ನಾವೇ ಕಾರಣಕರ್ತರು. ನಮ್ಮ ಕೆಲಸ ಬಲುಬೇಗ ಆಗಬೇಕಾದರೆ ಲಂಚ ಕೊಟ್ಟು ನಾವು ಕೆಲಸ ಮಾಡಿಕೊಳ್ಳುತ್ತೇವೆ. ಲಂಚ ಕೊಡುವುದು ಅಪರಾಧ ಎಂದು ಯೋಚಿಸಲೇ ಹೋಗುವುದಿಲ್ಲ. ಕೆಲಸ ಆಗಬೇಕು ಅಷ್ಟೆ. ಲಂಚ ಕೊಡುವುದು ನಿಲ್ಲಿಸಿದರೆ ಮಾತ್ರ ಲಂಚ ತೆಗೆದುಕೊಳ್ಳುವವರನ್ನು ಮಟ್ಟಹಾಕಬಹುದು. ನಮ್ಮ ಸ್ನೇಹಿತೆಯೊಬ್ಬಳು ಕೆ.ಪಿ.ಎಸ್.ಸಿ ಪರೀಕ್ಷೆಯಲ್ಲಿ ಉನ್ನತ ಅಂಕ ಪಡೆದು ಸಂದರ್ಶನಕ್ಕೆ ಆಯ್ಕೆಯಾಗಿದ್ದಳು. ಸಂದರ್ಶನಕ್ಕೆ ಹೋದಾಗ ಅಲ್ಲಿ ಬಾಯಿಬಿಟ್ಟು ಇಷ್ಟು ಲಕ್ಷ ಕೊಟ್ಟರೆ ಮಾತ್ರ ನಿನಗೆ ಕೆಲಸ ಸಿಗುತ್ತದೆ ಎಂಬ ನೇರ ನುಡಿ ಕೇಳಿ ಹೇಸಿಗೆ ಪಟ್ಟು ಅವಳು ವಾಪಾಸಾದಳು. ಅಷ್ಟೊಂದು ಹಣ ಇದ್ದರೆ ಕುಳಿತು ಜೀವನ ಸಾಗಿಸಬಹುದು. ಹೀಗೆ ಲಂಚ ಕೊಟ್ಟು ಸಿಗುವ ಕೆಲಸ ಬೇಕಾಗಿಲ್ಲ ಎಂದು ಗಟ್ಟಿ ಮನಸ್ಸು ಮಾಡಿದಳು. ಇಲ್ಲಿ ಸಂದರ್ಶನಕ್ಕೆ ಆಯ್ಕೆ ಆಗಲು ಅಂಕ ಮುಖ್ಯ, ಕೆಲಸ ಸಿಗಬೇಕೆಂದಾದರೆ ಕಾಂಚಾಣವೇ ಅತೀಮುಖ್ಯ. ಇದು ಎಲ್ಲರಿಗೂ ಗೊತ್ತಿರುವ ನಿತ್ಯಸತ್ಯ. ಈಗ ಆಗಬೇಕಾಗಿರುವುದು ಏನು? ಭ್ರಷ್ಟಾಚಾರವೆಂಬ ಬೇರು ಸಾಕಷ್ಟು ಆಳಕ್ಕೆ ಇಳಿದಿದೆ. ಅದನ್ನು ಹಂತಹಂತವಾಗಿ ಕತ್ತರಿಸಿ ನಾಶ ಮಾಡುವ ಕೆಲಸ ನಮ್ಮ ಯುವ ಪೀಳಿಗೆ ಮಾಡಬೇಕಾಗಿದೆ. ಎಳೆವೆಯಲ್ಲೇ ಶಾಲೆಗಳಲ್ಲಿ ಮಕ್ಕಳಿಗೆ ಅಂಥ ಶಿಕ್ಷಣ ಕೊಡುವ ವ್ಯವಸ್ಥೆಯಾಗಬೇಕು. ಸುಶಿಕ್ಷಿತರು ರಾಜಕೀಯ ಪ್ರವೇಶಿಸಬೇಕು. ಅಲ್ಲಂತು ಕೆಸರಿನ ಹೊಂಡವೇ ಆಗಿದೆ. ಭ್ರಷ್ಟಾಚಾರ ನಿರ್ಮೂಲಗೊಳಿಸಲು ಹೊರಟಿರುವ ಅಣ್ಣಾ ಹಜಾರೆಯಂಥವರ ಕೈಗಳನ್ನು ಬಲಪಡಿಸಬೇಕು.. ರಂಗಾಚಾರ್ಯರು ನೂರಕ್ಕೂ ಹೆಚ್ಚು ವರ್ಷಗಳ ಹಿಂದೆಯೇ ಹೇಳಿದ ಸೂತ್ರ ಅನುಸರಿಸಿದರೆ ಈಗಲೂ ಖಂಡಿತ ಒಂದಲ್ಲ ಒಂದು ದಿನ ಈ ಭ್ರಷ್ಟಾಚಾರವೆಂಬ ಬೇರನ್ನು ಕಿತ್ತು ಹಾಕಿ ಸದಾಚಾರವೆಂಬ ಹೊಸ ಸಸಿಯನ್ನು ಊರಬಹುದು.

Read Full Post »

ತಾರೀಕು ೧೫-೬-೨೦೧೧ರಂದು ರಾತ್ರಿ ಸುಮಾರು ೧೧.೪೫ಕ್ಕೆ ಆಕಾಶದಲ್ಲಿ ಚಂದ್ರನನ್ನು ವೀಕ್ಷಿಸಿದಾಗ ನನಗೆ ಮಾವ (ಜಿ.ಟಿ. ನಾರಾಯಣರಾವ್)ನ ನೆನಪಾಯಿತು. ಜುಲೈ ೨೦೦೦ ಇಸವಿಯಲ್ಲಿ ಚಂದ್ರಗ್ರಹಣ ಬಂದಿತ್ತು. ಆಗ ನಾನು ಏಳಲು ಸೋಮಾರಿತನವಾಗಿ ನೋಡಿರಲಿಲ್ಲ. ಬೆಳಗ್ಗೆ ಮಾವ ಗ್ರಹಣ ನೋಡಿದ್ದರ ಬಗ್ಗೆ ವಿವರಿಸುವಾಗ ಛೇ ನೋಡಬೇಕಿತ್ತು ಎಂದಾಗಿತ್ತು. ಮುಂದೆ ಬರುವ ಗ್ರಹಣವನ್ನು ನೋಡಲೇಬೇಕೆಂದು ಆಗಲೇ ಶಪಥ ಮಾಡಿದ್ದೆ. ಇಂಥ ದೀರ್ಘಾವಧಿಯ ಚಂದ್ರಗ್ರಹಣ ಇನ್ನು ಘಟಿಸುವುದು ೨೧೪೧ರಲ್ಲಿ. ಆಗ ನೋಡಲು ಹೇಗೂ ಸಾಧ್ಯವಿಲ್ಲ. ನೋಡಬೇಕೆಂದಾದರೆ ಮುಂದಿನ ಜನ್ಮ, ಅದರನಂತರದ ಜನ್ಮ ಎತ್ತಬೇಕು. ಅದರಲ್ಲೆಲ್ಲ ನಂಬಿಕೆ ಇಲ್ಲದ ಕಾರಣ ಈ ಜನುಮದಲ್ಲೇ ನೋಡಿ ಆನಂದಿಸುತ್ತೇನೆಂದು  ಮಲಗದೇ ಕಾದಿದ್ದು ಗ್ರಹಣ ವೀಕ್ಷಣೆ ಮಾಡಿದೆ. ಒಮ್ಮೆ ಮಲಗಿದರೆ ಮಧ್ಯ ಏಳಲು ಮನಸ್ಸು ಬರುವುದಿಲ್ಲ.
ಖಗೋಳದ ಬಗ್ಗೆ ಅಜ್ಞಾನಿಯಾದ ನಾನು ಆಕಾಶ ನೋಡುತ್ತ ಚಂದ್ರಗ್ರಹಣ ನೋಡಿ ಸಂತೋಷಪಟ್ಟೆ. ರಾತ್ರಿ ೧೧.೩೦ಕ್ಕೆ ಚಂದ್ರನ ಸುತ್ತ ಕೆಂಪುಪ್ರಭಾವಲಯ ಗೋಚರ. ನಿಜಕ್ಕೂ ಸುಂದರ ಆ ನೋಟ. ನೀರವ ರಾತ್ರಿಯಲ್ಲಿ ಚಳಿಗಾಳಿ ಬೀಸುತ್ತಿರಲು, ಆಕಾಶ ನೋಡುವುದೇ ಒಂದು ರೋಮಾಂಚನ ಅನುಭವ. ೧೧.೫೦ಕ್ಕೆ ಸ್ವಲ್ಪಭಾಗ ಕಪ್ಪು ಗೋಚರ. ೧೨.೧೦ಕ್ಕೆ ಭಾಗಶಃ ಗ್ರಹಣ. ೧೨.೨೦ ದಾಟುವಾಗ ಅರ್ಧಭಾಗ ಕಪ್ಪು. ೨.೨೦ಕ್ಕೆ ಭಾಗಶಃ ಪೂರ್ಣಗ್ರಹಣ ವೀಕ್ಷಿಸಿದೆ. ಕತ್ತಲು ತುಂಬಿತ್ತು. ನಿಜಕ್ಕೂ ನಗರಗಳಲ್ಲಿ ಬೀದಿದೀಪ ಉರಿಯದೆ ಇರುತ್ತಿದ್ದರೆ ಗ್ರಹಣ ಇನ್ನೂ ಚೆನ್ನಾಗಿ ಕಂಡುಬರುತ್ತಿತ್ತು ಎಂದೆನಿಸಿತು. ಮೋಕ್ಷ ತನಕ ಕೂರಲು ಸಾಧ್ಯವಾಗಲಿಲ್ಲ. ನಿದ್ರೆ ಆವರಿಸಿತು.
ಭಯವೇಕೆ ಖಗ್ರಾಸ ಚಂದ್ರಗ್ರಹಣಕೆ? ಎಂಬ ಶೀರ್ಷಿಕೆಯ ಲೇಖನವನ್ನು ಸ್ಥಳಿಯ ಪತ್ರಿಕೆಯಲ್ಲಿ ಆರ್.ಎಂ. ಮಧು ದೀಕ್ಷಿತ್ ಎಂಬ ಜ್ಯೋತಿಷಿಗಳು ಬರೆದಿದ್ದರು. ಅವರು ವಿವರಿಸುತ್ತ, `ಯಾವ ವಿಚಾರದಲ್ಲಿ ನಮಗೆ ಹೆಚ್ಚಿನ ಮಾಹಿತಿ ತಿಳಿದಿರುವುದಿಲ್ಲವೋ ಆ ವಿಚಾರದ ಬಗ್ಗೆ ಭಯ ಉಂಟಾಗುವುದು ಸಹಜ. ಹಾಗೆಯೇ ಸೂರ್ಯಗ್ರಹಣ ಹಾಗೂ ಚಂದ್ರಗ್ರಹಣದ ಬಗೆಗೂ ಜನತೆಯಲ್ಲಿ ಭಯ ಇದ್ದೇ ಇದೆ. ಖಗ್ರಾಸ ಚಂದ್ರಗ್ರಹಣ ಆಕಾಶಕಾಯಗಳ ನಡುವೆ ಘಟಿಸುವ ಒಂದು ಸಹಜ ಕ್ರಿಯೆ. ಚಂದ್ರ ಮತ್ತು ಸೂರ್ಯನ ನಡುವೆ ಭೂಮಿ ಬರುವುದರಿಂದ ನಡೆಯುವಂಥ ಕ್ರಿಯೆ ಅಷ್ಟೆ.’ ಇತ್ಯಾದಿ ಇತ್ಯಾದಿ ಬರೆದು, ಕೊನೆಗೆ `ಗ್ರಹಣಗಳ ಬಗ್ಗೆ ಭಯಬಿಟ್ಟು ನೋಡಿ ಆನಂದಿಸಿ’ ಎಂದು ಲೇಖನ ಮುಗಿಸಿದ್ದರು.
ಜ್ಯೋತಿಷಿಯೊಬ್ಬರು ಸರಿಯಾಗಿ ಬರೆದರಲ್ಲ, ವೈಜ್ಞಾನಿಕವಾಗಿ ಜನರಿಗೆ ತಿಳಿವಳಿಕೆ ಮೂಡಿಸಲು ಸಹಕಾರಿಯಾದರಲ್ಲ ಎಂದು ಲೇಖನ ಓದಿ ಬಹಳ ಸಂತೋಷಪಟ್ಟೆ. ಇತ್ತ ನಾನು ಸಂತಸದಲ್ಲಿ ಉಬ್ಬುತ್ತಿರಬೇಕಾದರೆ ನನ್ನ ಗಮನ ಲೇಖನದ ಕೆಳಗೆ ಇರುವ ಬಾಕ್ಸ್ ಕಡೆ ಹರಿಯಿತು. ಜೇಷ್ಠ, ಮೂಲ ನಕ್ಷತ್ರದಲ್ಲಿ ಚಂದ್ರಗ್ರಹಣ ಆಗುತ್ತಿರುವುದರಿಂದ ಈ ನಕ್ಷತ್ರದವರು ಶಾಂತಿ ಪೂಜಾದಿಗಳನ್ನು ಆಚರಿಸಬೇಕು. ವೃಶ್ಚಿಕ, ಕುಂಭ, ಮೀನ, ಸಿಂಹ, ಕನ್ಯಾ ಮತ್ತು ತುಲಾ ರಾಶಿಯವರು ಗ್ರಹಣ ನಿಮಿತ್ತ ಶಾಂತಿ ಪೂಜಾದಿಗಳನ್ನು ಆಚರಿಸಬೇಕು. ಇದು ವೈಜ್ಞಾನಿಕವೂ ಕೂಡ ಹೌದು ಎಂದು ದಪ್ಪ ಅಕ್ಷರದಲ್ಲಿ ಬರೆದಿರುವುದು ಕಂಡು ಸಂತೋಷವೆಂಬ ಬಲೂನಿಂದ ಸಂಪೂರ್ಣ ಗಾಳಿ ಹೋಗಿ ಭ್ರಮನಿರಸನವಾಯಿತು.  ಭಯಬಿಟ್ಟು ನೋಡಿ ಎನ್ನುವುದು ಒಂದುಕಡೆ, ಇಂಥ ನಕ್ಷತ್ರದವರು ಶಾಂತಿ ಪೂಜೆ ಮಾಡಿಸಿ ಎನ್ನುವುದು ಇನ್ನೊಂದು ಕಡೆ.  ಎಂಥ ವಿಪರ್ಯಾಸವಿದು. ನನ್ನದು ವೃಶ್ಚಿಕ ರಾಶಿ. ಖುಷಿಯಿಂದ ಗ್ರಹಣ ನೋಡಿದೆ. ಶಾಂತಿಯಾಗಲೀ ಪೂಜೆಯಾಗಲೀ ಏನೂ ಮಾಡಿಸಲಿಲ್ಲ. ಗ್ರಹಣದಿಂದ ನನಗೇನೂ ತೊಂದರೆಯಾಗಲಿಲ್ಲ.
ಹೀಗೆ ಜನರನ್ನು ಹಾದಿ ತಪ್ಪಿಸುವ ಲೇಖನಗಳನ್ನು ಜವಾಬ್ದಾರಿಯಿರುವ ಪತ್ರಿಕೆಗಳು ಏಕೆ ಪ್ರಕಟಿಸುತ್ತವೆಯೋ? ಹೆಚ್ಚಿನ ದಿನಪತ್ರಿಕೆಗಳಲ್ಲೂ ಇಂದಿನ ದಿನಮಾನಗಳಲ್ಲೂ ದಿನ ಭವಿಷ್ಯ, ವಾರಪತ್ರಿಕೆಗಳಲ್ಲಿ ವಾರ ಭವಿಷ್ಯ, ತಿಂಗಳ ಪತ್ರಿಕೆಗಳಲ್ಲಿ ಮಾಸ ಭವಿಷ್ಯಕ್ಕಾಗಿ ಒಂದು ಎರಡು ಪುಟಗಳನ್ನು ಮೀಸಲಿಟ್ಟು ಜನರನ್ನು ಮೂರ್ಖರನ್ನಾಗಿಸುವ ಪರಿಗೆ ಏನು ಹೇಳೋಣ? ನಿಜಕ್ಕೂ ಜನ ಇಂಥದನ್ನು ಓದಿ ನಂಬಿ ನಡೆಯುತ್ತಾರೆಯೇ? ಎಂದು ಅಚ್ಚರಿಯಾಗುತ್ತದೆ.  ಹೀಗೆ ಅಮೂಲ್ಯ ಪುಟಗಳನ್ನು ಹಾಳುಗೈಯುವ ಪರಿಗೆ ನಗಬೇಕೋ ಅಳಬೇಕೋ ಗೊತ್ತಾಗುತ್ತಿಲ್ಲ. ನಿಜಕ್ಕೂ  ಹೊಸತು ಮಾಸಪತ್ರಿಕೆ ಮಾಸಭವಿಷ್ಯ ಪ್ರಕಟಿಸದೆ ದಿಟ್ಟವಾಗಿರುವುದು ಹೆಮ್ಮೆಯ ಸಂಗತಿ.

Read Full Post »

Older Posts »